![](uploads/news/653681f986f400.25475125.jpg)
გამარჯობა,
მე თამარ კობახიძე ვარ, საქართველოს ულამაზესი კუთხე რაჭიდან, ამბროლაურის მუნიციპალიტეტის სოფელ ნიკორწმინდიდან, პროფესიით მარკეტოლოგი გახლავართ და ვარ საინტერესო იდეის „შაორი სფეისის“ ავტორი, რომელიც წარმოადგენს გლემფინგ ბანაკს არაჩვეულებრივ ბუნებაში, შაორის ტბის პირას. ეს იდეა ძალიან ადრე გამიჩნდა, ჯერ კიდევ საფრანგეთში ყოფნისას, როდესაც სტაჟირებას გავდიოდი იქაურ ტურისტულ კომპანიაში. ზოგადად ტურიზმით სულ ვიყავი დაინტერესებული და მინდოდა ჩემს ქვეყანაში საინტერესო ტურისტული პროდუქტის შექმნა.
მოგეხსენებათ ნებისმიერი საქმიანობისას ყველაზე რთული დაწყებაა, მეც ზუსტად ასეთ სიტუაციაში აღმოვჩნდი, რადგან მქონდა იდეა, მქონდა ადგილი, მაგრამ არ მქონდა საჭირო ფინანსები ჩემი იდეის განსახორციელებლად. შესაბამისად აქტიურად ვიყავი საგრანტო პროგრამების მოძიებაში ჩართული და ერთ დღესაც, ვიტყვი რომ გამიმართლა, როდესაც შემხვდა სოციალურ ქსელში ინფორმაცია ევროკავშირის, შვედეთი და ავსტრიის ერთობლივი ინიციატივით მხარდაჭერილ პროექტ GRETA-ს შესახებ. პროექტი ზუსტად ერგებოდა ჩემს იდეას, მოიცავდა რაჭა-ლეჩხუმის რეგიონს და აფინანსებდა ტურიზმის და მწვანე ეკონომიკის მიმართულებას.
იდეა, რომელიც ძალიან მომწონდა და მჯეროდა მისი პერსპექტივის, საინტერესო აღმოჩნდა დონორებისთვისაც და პროექტის დაწერის შემდეგ მალევე მივიღე დაფინანსება. შეიძლება ითქვას რომ ეს იყო ჩემი საქმიანობის მთავარი და საკვანძო ეტაპი, ჩემმა იდეამ განხორციელება დაიწყო! პროექტის ფარგლებში შევიძინეთ 5 გლემფინგ კარავი, ასევე შევიძინეთ ყველა საჭირო ავეჯი და ტექნიკა. ჩვენი წილი თანამონაწილეობა იყო მიზერული და მოიცავდა ინფრასტრუქტურის მოწყობას ეზოში და კანალიზაციის შეყვანას და ა.შ. აქვე მინდა ვუთხრა სხვა დამწყებ მეწარმეებს რომ მსგავსი პროექტებით აუცილებლად ისარგებლონ რადგან ასეთი თანადაფინანსების პირობები ვფიქრობ იშვიათია.
ასევე მინდა ვახსენო გრეტას ფარგლებში ჩატარებული ტრენინგები, რომლის საფუძველზეც მივიღე ცოდნა სწორად წარმემართა პროექტი, ამან ამიმაღლა კვალიფიკაცია და ზოგადად შეიძლება ითქვას რომ საინტერესო გამოცდილება მივიღე უცხოურ პროექტებთან თანამშრომლობის.
ამ ეტაპზე მთავარი პრიორიტეტი „შაორი სფეისის“ გახსნაა, ვიმედოვნებ რომ წარმატებული იქნება, რადგან სხვა უამრავი ტურისტული ობიექტია გარშემო და ერთმანეთს დავეხმარებით გაზრდაში. ზოგადად მნიშვნელოვნად მიმაჩნია მეტად ინფორმირებულები ვიყოთ რეგიონში არსებული ბიზნესები ერთმანეთის შესახებ, რომ პრაგმატული კვეთა გავაკეთოთ ერთმანეთთან, რაც ვფიქრობ მეტ ურთიერთსარგებელს მოგვიტანს.
გეგმები კიდევ მაქვს, მათ შორის მინდა აქვე შაორის ტბის პირას ასტროტურიზმის განვითარება, რადგან ამისთვის ხელსაყრელი პირობებია და ციურ სხეულებზე დაკვირვებისთვის მინი ობსერვატორია და ვორკშოპები მინდა გავაკეთო. ზოგად ეს მიმართულება არაა ჯერ განვითარებული საქართველოში და ვფიქრობ წარმატებული იქნება.
გრეტა პროექტთან წარმატებული თანამშრომლობის მაგალითი არის მოტივაცია, რომ კვლავ მზაობა გამოვხატო სხვა მსგავსი საგრანტო პროგრამების მიმართ, მითუმეტეს მაქვს გეგმები რომლის განსახორციელებლადაც მჭირდება ახალი საქმიანი კავშირები და შესაბამისად მზად ვარ სათანამშრომლოდ. დაინტერესების შემთხვევაში კომუნიკაცია შესაძლებელია ტელეფონის: 599203537, ელ-ფოსტის: t_kobakhidze@yahoo.com საიტი ჯერ მზადების პროცესშია და ჩემი ფეისბუქ გვერდის „შაორი სფეის“-ის მეშვეობით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის